21-րդ դարում մարդիկ տեղեկատվական հասարակության գլխավոր ակտիվն են. Ռուբեն Վարդանյան

21-րդ դարում մարդիկ տեղեկատվական հասարակության գլխավոր ակտիվն են, և հենց նրանց համար է գնալու պայքարը: Այդ մասին ТАСС-ին տված հարցազրույցում ասել է  ռուսաստաբնակ հայտնի գործարար և բարերար Ռուբեն Վարդանյանը:

«Այդ իսկ պատճառով կրթությունը շատ կարևոր է: Ռուսաստանը 90-ականներին տրիլիոն դոլարների ուղեղ է կորցրել: Նրանք արտագաղթել են Իսրայել, ԱՄՆ, Եվրոպա, Հարավային Կորեա»,- ասել է Վարդանյանը` ցանկություն հայտնելով, որ մի օր էլ հակառակ գործընթացը տեղի ունենա:

Նա նշել է, որ բոլորը տեսնում են, թե ինչքան երեխաներ են մեկնում Արևմուտք` սովորելու, իսկ իրենց նախագծերն այն մասին են, որ նաև հետխորհրդային տարածքում կարելի է ստեղծել մրցունակ ուսումնական հաստատություններ:

«Դիլիջանի մեր դպրոցում սովորում են երեխաներ աշխարհի 72 երկրից: Ոչ թե տեղի հայեր կամ Սփյուռքի, այլ ամերիկացիներ, եվրոպացիներ, ավստրալացիներ, Ասիայի և Աֆրիկայի երկրների բնակիչներ… Եվ «Սկոլկովո»-ն մենք գործընկերների հետ ստեղծել ենք որպես բիզնես դպրոց, ուր պետք է ժամանեին օտարերկրացիներ: Չեմ թաքցնի, գոհ եմ, որ դպրոցը ցույց տվեց, որ բոլոր այն խոսակցությունները, թե ՌԴ-ի հարուստ և հաջողակ մարդիկ ունակ չեն աշխատել և լեզու գտնել օտարերկրացիների հետ, հիմքեր չունեն: Եթե ճիշտ հիմքեր են դրված, ամեն ինչ հնարավոր է»,- ասել է գործարարը: