Քուրդ զինյալները կապեր ունեն մեր խորհրդարանում. Էրդողան

Թուրքիայի նախագահ Ռեջեփ Թայիփ Էրդողանը, ի վերջո, խոսել է Ժողովուրդների դեմոկրատական կուսակցության համանախագահների և պատգամավորների ձերբակալության մասին:

Ըստ Demokrathaber-ի՝ նա պնդել է, որ Թուրքիայում ահաբեկչական համարվող Քուրդիստանի բանվորական կուսակցության կապերը միայն Քանդիլում չեն:

«Նրանք մեր խորհրդարանում կապեր ունեն: Հունիսի 7-ին 80 պատգամավոր ձերբակալվեց: Դրան հաջորդող օրը ժողովրդին փողոց դուրս գալու կոչ արեցին՝ պատճառ դառնալով 52 հոգու մահվան: Իրականում կատարվածը շատ պարզ է և հստակ: Մեր մեջլիսը մայիս ամսին հանեց բոլոր պատգամավորների անձեռնմխելիությունը՝ անխտիր: Այնպես որ` սա միայն նրանց ուղղված գործողություն չէ»,- հայտարարել է Էրդողանը:

Անուղղակիորեն անդրադառնալով նաև  համանախագահներ Սելահաթթին Դեմիրթաշի և Ֆիգեն Յուքսեթդաղի ձերբակալությանը՝ նա պնդել է, որ այդ կուսակցության անդամներն այդ փաստը փորձում են որպես սադրանք օգտագործել:

«Պատգամավորների անձեռնմխելիությունը հարցով դատական համակարգին մարտահրավեր ուղղող անմիտների նպատակը Թուրքիային միջազգային ասպարեզում վատ դրության մեջ գցելն է»,- հայտարարել է Էրդողանը:

Հիշեցնենք, որ Քուրդիստանի բանվորական կուսակցության հետ կապեր ունենալու և նրանց աջակցելու մեղադրանքով նոյեմբերի 4-ին ձերբակալվել է Ժողովուրդների դեմոկրատական կուսակցության 11 անդամ, այդ թվում՝ կուսակցության համանախագահներ Սելահաթթին Դեմիրթաշն ու Ֆիգեն Յուքսեքդաղը: