Կրթության համակարգն այլեւս հնարավոր չի լինի կուսակցականացնել

Այսօր ԱԺ կրթության հարցերի մշտական հանձնաժողովում քննարկվում էր կրթության ոլորտին վերաբերող` 2017 թ. բյուջեի նախագծի բաժինը: ՀԱԿ խմբակցության քարտուղար Արամ Մանուկյանը կրթության և գիտության նախարար Լևոն Մկրտչյանից հետաքրքրվեց, թե զեղչվում է այն ուսանողների կրթության վճարը, որոնք մասնակցել են ապրիլյան քառօրյա պատերազմին: Պատգամավորը նաև հավելեց, որ, ըստ հարցումների, կրթության ոլորտն ամենակոռումպացվածներից է, ի՞նչ է արվում համակարգը կոռուպցիայից ազատելու և ապաքաղաքականացնելու ուղղությամբ: «Լսել եմ, որ Դուք ցանկանում եք ապաքաղաքականացնել կրթական համակարգը»,- ասաց պատգամավորը:

Նախարարը, պատասխանելով ապրիլյան պատերազմին մասնակցած ուսանողների մասին հարցին, նշեց, որ այդտեղ խնդիր կա` թե ինչ փաստաթղթով է ֆիքսվում, որ տվյալ ուսանողը մասնակցել է քառօրյա պատերազմին: Նրա համոզմամբ` ամեն օր Արցախի սահմանին ընթանում է «ապրիլյան պատերազմ», և մարտական հերթապահությանը մասնակից ուսանողների ուսման վարձը զեղչվում է 30 տոկոսով:

Ինչ վերաբերում է կոռուպցիային, նախարարը կարծիք հայտնեց, որ ցանկացած երևույթ, որը կա հասարակության մեջ, կարող է արտացոլումը գտնել նաև կրթության ոլորտում, բայց չի կարծում, որ հենց կրթության ոլորտում է կոռուպցիայի պիկը: Բայց որ կոռուպցիայի դեմ պետք է պայքարել՝ այն դարձնելով գերակա, դա միանշանակ է:

«Կրթության կուսակցականացմանը կտրուկ դեմ  եմ եղել միշտ, կրթական համակարգում կուսակցականությունը չպետք է օգտագործվի»,- ասաց Լևոն Մկրտչյանը՝ հավելելով, որ բարձրագույն կրթության մասին օրենքը, որը շուտով պետք է ներկայացվի խորհրդարանին, կամրագրի օրենսդրական հիմքեր, որոնք հնարավորություն չեն տա կուսակցականացնելու  կրթական համակարգը: