Քո «կարմիր գծի» վրա մենք մեկ գիծ էլ կտանենք. Թուրքիայի վարչապետի լկտի պատասխանը՝ ԵԽ նախագահին

Թուրքիայի վարչապետ Բինալի Յըլդըրըմը ելույթ է ունեցել իշխող «Արդարություն և զարգացում» կուսակցության ժողովում: Ըստ «Անադոլու» գործակալության՝ նա անուղղակիորեն անդրադարձել է ԵԽ նախագահ Մարտին Շուլցի՝ Թուրքիայում ընդդիմադիր Cumhuriyet թերթի դեմ գործողությունների և դրա աշխատակիցների ձերբակալության վերաբերյալ հայտարարությանը:

Հիշեցնենք, որ Շուլցն այդ մասին իր Twitter-յան էջում հայտարարություն է տարածել: Նշելով, որ Cumhuriyet-ը պատահական թերթ չէ, այն Թուրքիայի աշխարհիկ ամենահին թերթն է և հանրապետության կառույցներից մեկը, նա ասել է. «Թերթի խմբագիր Մուրադ Սաբունջուի և մյուս թղթակիցների ձերբակալությունը նշանակում է, որ Թուրքիայում խոսքի ազատության հարցում «կարմիր գիծ»-ը հերթական անգամ հատվել է»:

«Եվրախորհրդարանում ինչ-որ մեկը հայտարարում է՝ այս թերթի ձերբակալությունները մեր «կարմիր գիծ»-ն են… Եղբա'յր, մեզ չի հետաքրքրում քո «կարմիր գիծը-միծը»: Մեզ մոտ այն գծում է ժողովուրդը: Քո «կարմիր գիծ»-ն ի՞նչ արժեք ունի: Քո քաշած գծի վրա մենք մեկ գիծ էլ կտանենք: Վերջ տվեք նման բաներին»,- հայտարարել է Թուրքիայի վարչապետը: