Գյուղացին պետք է բիզնեսի կանոններով աշխատի. Վայոց ձորի մարզպետ

Վայոց ձորի մարզպետ Հարություն Սարգսյանն այսօր խորհրդարանում լրագրողների հետ զրույցում հավաստիացրեց, որ, խաղողի բերքի մթերման հետ կապված, այս տարի խնդիրներ չկան, քանի որ բերքն էլ քիչ էր: Ըստ նրա՝ միայն մարզի Աղավնաձոր համայնքի բնակիչներն էին բողոքում, բայց այդ խնդիրն էլ է լուծվել:

«Խնդիրն էլ առաջ էր եկել, քանի որ անցյալ տարի խաղողի բերքը շատ էր եղել: Գիտեք՝  ընդհանուր ճգնաժամային իրավիճակը բերեց այս խնդրին: Այս տարի, ցավոք, քիչ էր խաղողի բերքը, և մեկ կիլոգրամի գինը հասավ 280 դրամի»,- ասաց մարզպետը:

Հարցին, թե ինչպե՞ս է ստացվում, որ բերքը շատ է լինում` բողոքում են, քիչ է լինում` բողոքում են, նա պատասխանեց, թե ինքը երբեք չի բողոքել, որ բերքը շատ է:

«Գյուղացին գիտի, որ շուկա է, և ինքն էլ կողմակից է, որ կարողանան արագ փոխել և բիզնեսի կանոններով աշխատել»,- ասաց նա:

Մարզպետից նաև հետաքրքրվեցին, թե ինչպե՞ս է վերաբերվում փոխմարզպետերի կրճատումներին: Նա պատասխանեց, որ յուրաքանչյուր փոխմարզպետ ունի իր վրա դրված առաջադրանք: Ըստ նրա՝ կոնկրետ Վայոց ձորը երկու փոխմարզպետ ունի, և կրճատելու խնդիր չկա: Սարգսյանը հավաստիացրեց, որ իրենք հնարավորինս խնայողություններ արել են: