Շենգավիթի դատավորի կողմից կաշառք ստանալու դեպքի առթիվ քրեական գործ է հարուցվել

Yerkir.am-ի տեղեկություններով` Երեւան քաղաքի Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի կողմից ենթադրյալ կաշառք ստանալու վերաբերյալ նախապատրաստված նյութերը դատախազությունը փոխանցել է ՀՔԾ-ին:  Հատուկ քննչական ծառայությունում դեպքի առթիվ հարուցվել է քրեական գործ` ՀՀ ՔՕ 311-րդ հոդվածի 4-րդ մասի 3-րդ կետի (Դատավորի կողմից կաշառք ստանալը) հատկանիշներով:

Ավելի վաղ ԱԱԾ-ն հայտնել էր, որ քաղաքացիական գործով կողմի օգտին որոշում կայացնելու համար դատավորը պահանջել և Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:

Մեր տեղեկություններով՝ Իշխան Բարսեղյանը լուրջ ֆինանսական խնդիրներ ու չկատարած վարկային պարտավորություններ ունի: Նա դեռևս իրեն մեղսագրվող հանցանքի վերաբերյալ դիրքորոշում չի հայտնել: