Միշտ չէ, որ քաղաքական դաշտ մտնելու համար պետք է անբարոյական լինել. ՀՀԿ-ն՝ Դալլաքյանի մասին

Այսօր լրագրողների հետ զրույցում ԱԺ ՀՀԿ խմբակցության քարտուղար Գագիկ Մելիքյանն անդրադարձավ ՀՀ աշխատակազմի ղեկավարի տեղակալ Վիկտոր Դալլաքյանի սկանդալային հայտարարություններին, ով որոշել է անցնել ընդդիմադիր դաշտ այն պահին, երբ դեռ նախագահը չէր հասցրել ստորագրել նրա հրաժարականի դիմումը:

Ըստ Մելիքյանի` նորություն չէ, որ Վիկտոր Դալլաքյանը սկանդալային հայտարարություններ է անում, և առաջին անգամը չէ, որ նա դուրս է գալիս ՀՀԿ-ից:

«Չեմ ընդունում այդ ձևաչափը, ոճը: Երբեք պետք չէ, ուրիշին մրոտելով, ցեխոտելով, ավելորդ` սենսացիոն կոչված արտահայտություններով, հանրապետության  նախագահի հասցեին տարբեր անհիմն արտահայտություններ անելով, փորձել դիվիդենդներ շահել: Այսպես չի կարող լինել հատկապես նրա պարագայում: Դա ժողովրդի կողմից անընդունելի է: Միշտ չէ, որ քաղաքական դաշտ մտնելու համար պետք է անբարոյական լինել»,- ասաց Գագիկ Մելիքյանը:

Լրագրողների հարցին, որ շրջանառվող խոսակցությունները, թե Բաղրամյան 26-ից է Դալլաքյանը գործուղվել ընդդիմադիր դաշտ` այն փոշիացնելու համար, պատգամավորը պատասխանեց, որ դա բամբասանք է:

«Ես էլ կասեմ, որ խոսակցություններն այն մասին են, որ Վիկտոր Դալլաքյանը մտել է ընդդիմադիր դաշտ` կոնկրետ «Լուսավոր Հայաստան»-ի առաջնորդ Էդմոն Մարուքյանի դեմ անձնական պայքարը շարունակելու համար: Վիկտոր Դալլաքյանի գործելաոճը նրա համար է, որ դառնա պատգամավոր: Բայց նման գործելաոճը սխալ է ու անընդունելի: Ավելացնեմ, որ եթե ինձ հետ մի բան պատահի, Վիկտոր Դալլաքյանին չմեղադրեք»,- ասաց Մելիքյանը: