Հարկային վարչարարությունը բարելավվել է, բայց թեմատիկ ստուգումների վրա չեն կարող սահմանափակումներ դնել

Այսօր ԱԺ արտահերթ նիստում քննարկվում է վերափոխված հարկային նոր օրենսգրքի նախագիծը երկրորդ ընթերցմամբ ընդունելու հարցը:

ԲՀԿ խմբակցության պատգամավոր Միքայել Մելքումյանը հարցրեց` հարկային նոր օրենսգիրքը նախատեսո՞ւմ է վարչարարության թեթևացում, որ հարկային ծառայության աշխատակիցը ներկա չգտնվի տնտեսվարող սուբյեկտի մոտ:

Զեկուցող` ՊԵԿ նախագահի տեղակալ Վախթանգ Միրումյանը նշեց, որ օրենսգրքով նախատեսված են վարչարարության էական բարելավումներ, վերանայվել է ստուգումների ողջ համակարգը, առհասարակ` վերացվել են հանդիպակաց ստուգումները: Առաջարկվում է ցանկացած ստուգման ժամանակ սահմանել այնպիսի մեխանիզմ, որ դա չվերածվի բյուջեի վերաբերյալ շտկումներ պարզելուն:

Ըստ Միրումյանի` տեղեկատվությունը պետք է փոխանցվի գրավոր եղանակով: Իսկ թեմատիկ ստուգումների ժամանակ, երբ հարկայինը փորձում է ճշտել չգրանցված աշխատողներին, ՀԴՄ առկայությունը և այլն, ապա այդ այցելությունները չեն կարող սահմանվել օրենսգրքով, սահմանափակումներ չեն կարող դնել այցելությունների ու ստուգումների վրա: