Սա մեսիջ է. Արփինե Հովհաննիսյանը զեկուցում է կառավարության կառուցվածքային փոփոխությունների մասին

Այսօր ԱԺ արտահերթ նիստում քննարկվում է կառավարության կառուցվածքային փոփոխությունների հարցը: Արդարադատության նախարարի պաշտոնակատար Արփինե Հովհաննիսյանը ներկայացրեց փոփոխությունները, ըստ որոնց` էկոնոմիկայի նախարարությունը վերանվանվում է տնտեսական զարգացման եւ ներդրումների նախարարության, տրանսպորտի նախարարությունը` տրանսպորտի, կապի և ՏՏ նախարարություն, էներգետիկայի ու բնական պաշարների նախարարությունը` էներգետիկ ենթակառուցվածքների և բնական պաշարների նախարարություն: Լուծարվում է քաղաքաշինության նախարարությունը:

«Նախարարությունների անվանումների փոփոխությունը պայմանավորված է նոր կառավարության կողմից որոշակի առաջնահերթությունների ընդգծմամբ, նոր մոտեցումների մեկնարկով»,- ասաց նա:

Արտահերթ առաջարկ ուներ ԱԺ նախագահի տեղակալ Էդուարդ Շարմազանովը: Նա նշեց, որ Հանրապետական կուսակցությունը քննարկել է Սփյուռքի նախարարությունը Սփյուռքի և հայրենադարձության նաախարարություն վերանվանելու հարցը: Շարմազանովը դա բացատրեց նրանով, որ բոլոր սփյուռքահայերի հայացքները պետք է ուղղված լինեն Հայաստանին, և որ դա ուղերձ կլինի աշխարհի հայությանը, որ հայրենադարձությունը Հայաստանի ռազմավարություններից մեկն է: Նա հավելեց, որ ոգեշնչվել են Իսրայելի հաջող օրինակով:

Արփինե Հովհաննիսյանը նշեց, որ կարևորում է այդ հարցադրումը, հասկանում է, թե ինչու է «հայրենադարձություն» բառը կարևորվում, հասկանում է, թե ինչ են ուզում դրանով փոխանցել: «Այդ փոփոխությունը նաև ֆունկցիոնալ փոփոխություններ կառաջացնի, սա մեսիջ է: Ինձ համար ընդունելի է, ընդունում եմ ի գիտություն, առաջիկայում այդ առաջարկը կդարձնենք քննարկման առարկա և կտեղեկացնենք որոշումների մասին»,- ասաց նա: