Բրազիլիայից Երևան են եկել՝ մասնակցելու Անկախության 25-ամյակի միջոցառմանը

ՀՅԴ Բրազիլիայի  «Դրո» կոմիտեության անդամներ  Կարլոս Կարապետ Գեողլանյանը և Արամ Գեմիշյանը  Yerkir.am-ի հետ զրույցում պատմեցին, որ Սան Պաուլոյից Հայաստան են եկել՝ մասնակցելու Անկախության 25-ամյակի միջոցառմանը:

«Սա պատմական իրադարձություն է, և մենք ամեն ինչ արեցինք, որ ներկա գտնվենք այդ իրադարձությանը:  Ես արդեն չորրորդ անգամն է, որ  մասնակցում եմ անկախության տոնին նվիրված միջոցառումներին և տարեցտարի տեսնում եմ դրական փոփոխությունները: Զարգացում եմ տեսնում, բավականին շատ փոփոխություններ ենք տեսել Հայաստանում»,- ասաց Գեողլանյանը, ով հպարտության զգացումով է համակվել՝ տեսնելով ՀՀ ԶՈւ-ի այսօր ցուցադրված զինտեխնիկան: «Ապահովություն զգացի և կազմակերպվածություն: Ժողովրդի այսչափ ոգևորությունն ինձ էլ վարակեց և հայկական ոգին ու շունչը շատ մոտիկից զգացի»,- ասաց նա:

Արամ Գեմիշյանն էլ ասաց, որ առաջին անգամ է գալիս Հայաստան, և Հայաստան գալու պատճառներից մեկն էլ ցանկությունն էր` սեփական աչքերով տեսնել 25-ամյա անկախ ու ազատ Հայաստանը: «58 տարեկան եմ, և ինձ համար երազանք էր Հայաստանը սեփական աչքերով տեսնելը»,- ասաց նա: