Վարչապետը հետին թվով չեղարկել է փեսայի գործուղումը

Արդեն տեղեկացրել ենք, որ վարչապետ Կարեն Կարապետյանը չեղյալ է ճանաչել նախկին վարչապետ Հովիկ Աբրահամյանի` սեպտեմբերի 6-ի` «Հայկ Հարությունյանին Ղազախստանի Հանրապետություն գործուղելու մասին» որոշումը: Նշենք, որ Հայկ Հարությունյանը նորանշանակ վարչապետի փեսան է, Հայաստանի Հանրապետության էներգետիկայի և բնական պաշարների նախարարի տեղակալը:

Հովիկ Աբրահամյանի՝ սեպտեմբերի 6-ի որոշման մեջ նշվում է. «Հայաստանի Հանրապետության էներգետիկայի և բնական պաշարների նախարարի տեղակալ Հայկ Հարությունյանին 2016 թվականի սեպտեմբերի 12-15-ը գործուղել Ղազախստանի Հանրապետություն (Աստանա)՝ «Կանաչ կամուրջ» համաժողովին մասնակցելու նպատակով»:

Ուշագրավ է, որ որոշումը չեղարկելու մասին` Կարեն Կարապետյանի որոշումը կառավարության կայքում դրվել է այսօր, մինչդեռ Հայկ Հարությունյանի գործուղման օրեր են նշված սեպտեմբերի 12-15-ը: Հիշեցնենք, որ Կարապետյանը վարչապետ նշանակվել է սեպտեմբերի 13-ին: