Թուրքիայում 7 միլիոն մարդ անգրագետ է. ՄԱԿ-ի զեկույց

Միավորված ազգերի` կրթության, գիտության և մշակույթի հարցերով կազմակերպությունը (UNESCO)  սեպտեմբերի 8-ին՝ Գրագիտության համաշխարհային օրվան ընդառաջ, ուշագրավ տվյալներ է հրապարակել աշխարհում գրագիտության մակարդակի վերաբերյալ:

Թուրքական Diken լրատվակայքի տեղեկացմամբ՝  UNESCO-ի վիճակագրական ինստիտուտի տվյալների համաձայն՝ վերջին 50 տարում երիտասարդների շրջանում գրագիտության մակարդակը, ընդհանուր առմամբ, բարձրացել է: Սակայն ամբողջ աշխարհում 15 տարեկանից բարձր տարիքային խմբին պատկանող շուրջ 758 մլն մարդ անգրագետ է:  Նրանց երկու երրորդը կանայք են: 
Մասնավորապես` Թուրքիայում ավելի քան 7 մլն մարդ գրագետ չէ, ընդ որում` նրանց մեծ մասը կանայք են:

Ըստ Ermenihaber-ի՝ Թուրքիայի ազգային  կրթության և  գիտության նախարարության կողմից 2015թ. կազմված «Թուրքիայի գրագիտության քարտեզի» համաձայն՝ միայն Ստամբուլում գրել-կարդալ չգիտի  310.790 քաղաքացի: Այս ցուցանիշն Անկարայում կազմում է 105.614, Իզմիրում՝ 65.573:

Հիշեցնենք, որ Թուրքիայի բնակչությունը 2016թ. հունվարի դրությամբ կազմում է 78.74  մլն, հետևաբար, անգրագիտությունը կազմում է այս երկրի բնակչության 10 տոկոսը: