Գիշերը Մատաղիսում մահացած Արմանն ակտիվ մասնակցություն է ունեցել ապրիլյան պատերազմին

Այսօր` ժամը 01:30-ի սահմաններում, ԼՂՀ Պաշտպանության բանակի հյուսիսարեւելյան ուղղությամբ տեղակայված զորամասերից մեկի պահպանության տեղամասում, մարտական հերթապահության կրման կանոնների խախտման արդյունքում, մահացու հրազենային վիրավորում ստացած Արման Ղանդիլյանն ակտիվ մասնակցություն է ունեցել ապրիլյան մարտական գործողություններին: Այս մասին Yerkir.am-ին հայտնեցին ապրիլյան պատերազմում վիրավորված Արմանի ընկերոջ՝ Մայիս Ներսիսյանի հարազատները:

Արմանն ու Մայիսը, ովքեր նույն թաղամասի բնակիչներ են, միասին են մասնակցել ապրիլյան ռազմական գործողություններին: Մեր զրուցակցի խոսքով՝ Մայիսը, ով ապաքինվելուց հետո վերադարձել էր ծառայության, Մատաղիսից գալու է՝ ընկերոջ հուղարկավորությանը մասնակցելու համար:

Հիշեցնենք, որ Արմանն ընտանիքի միակ արու զավակն էր, իրենից մեծ մեկ քույր ունի: Արմանն ընտանիքի հետ բնակվում էր Գավառի Արծվաքար թաղամասում, մեկ տարվա ծառայող էր: ԼՂՀ ՊԲ-ից հայտնում են, որ դեպքի մանրամասները պարզելու համար կատարվում է քննություն:

ԼՂՀ նախագահ Բակո Սահակյանի այսօրվա հրամանագրով՝ Արման Ղանդիլյանը հետմահու պարգեւատրվել է «Մարտական ծառայություն» մեդալով՝ Լեռնային Ղարաբաղի Հանրապետության պետական սահմանը պաշտպանելիս ցուցաբերած արիության համար: