Հույս ունենք, որ հետ կբերենք Միհրանի ոսկե մեդալը. Սամվել Գևորգյան

Օլիմպիական խաղերի փոխչեմպիոն Միհրան Հարությունյանի անձնական մարզիչ Սամվել Գևորգյանն այսօր լրագրողներին հայտնեց, որ ամեն ինչ անելու են, որպեսզի հետ բերեն Միհրան Հարությունյանից խլված ոսկե մեդալը։

«Միհրան Հարությունյանը արդեն 4 տարի է, ինչ Հայաստանում է։ Այստեղ մարզվելու ընթացքում նա պետք է ունենար 2 ոսկի։ 2015 թվականի աշխարհի առաջնությունում նա անարդարացիորեն զրկվեց մեդալից, իսկ Բաքվի Եվրոպական խաղերում` ոսկե մեդալից։ Եզրափակիչ գոտեմարտում բոլորդ տեսաք, թե ինչպիսի անբարո կերպով խլեցին մեր ոսկե մեդալը։ Օլիմպիական խաղերում նա ոչ մի բացթողում չի արել, նույնիսկ` մարզիչների համար։ Եզրափակիչում սերբ մրցակիցն անընդհատ քաշում էր նրա մարզահագուստը, որը նկատողության էր արժանի, և եթե մրցավարը գոնե մեկ անգամ պարտեր դներ սերբին, ապա գոտեմարտը կավարտվեր ավելի շուտ։ Մենք խորհրդակցում ենք հիմա ՀԱՕԿ նախագահ Գագիկ Ծառուկյանի հետ և հույս ունենք, որ հետ կբերենք ոսկե մեդալը։ Գործը հիմա Լոզանի մարզական դատարանում է»,- ասաց Գևորգյանը։ 

Լուսանկարը` News.am Sport-ի