Թուրքիան և Վրաստանը խորացնում են համագործակցությունը մշակույթի ոլորտում

Թուրքիայի մշակույթի և զբոսաշրջության նախարար Նաբի Ավջըն հանդիպում է ունեցել Վրաստանի մշակույթի և հուշարձանների պահպանության նախարար Միխաիլ Գիորգաձեի հետ, ով Թուրքիայում է գտնվում Ստամբուլում անցկացվող ՅՈՒՆԵՍԿՕ-ի համաշխարհային ժառանգության հանձնաժողովի 40-րդ նիստին մասնակցելու նպատակով. տեղեկացնում է Ermenihaber-ը:

Ըստ թուրքական «Haberdetaylari.com» լրատվական կայքի` Նաբի Ավջըն վրացական հեռուստատեսությանը տված հարցազրույցում հայտարարել է, որ հանդիպման ընթացում համաձայնություններ են ձեռք բերվել 2 երկրներում առկա պատմական հուշարձանների և ընդհանուր մշակութային խորհրդանիշների համատեղ պահպանություն իրականացնելուն ուղղված քայլերի շուրջ: Թուրք նախարարը նշել է, որ կողմերը պայմանավորվել են համաձայնեցնել նաև ՅՈՒՆԵՍԿՕ-ի համաշխարհային ժառանգության հանձնաժողովի նիստին Թուրքիայի և Վրաստանի վերաբերյալ ընդունվելիք որոշումները` խորացնելով նշյալ միջազգային հարթակում համագործակցությունը:

Ավջըն նշել է, որ մոտ ժամանակներս պատրաստվում է այցելել Վրաստան, որտեղ տեղի ունենալիք բանակցություններից հետո երկու երկրների միջև համագործակցության համապարփակ պայմանագիր կստորագրվի: