Օրը կգա, բարին հետը, մի՛ շտապեք. Շարմազանովը՝ Սերժ Սարգսյանի հետագա պաշտոնի մասին

ԱԺ փոխխոսնակ Էդուարդ Շարմազանովն այսօր լրագրողների հետ զրույցում անդրադարձավ Սերժ Սարգսյանի՝ «Ռոյթերզ»-ին տված հարցազրույցում հնչեցրած այն դիտարկմանը, թե եթե Հանրապետականը չհաղթի խորհրդարանական ընտրություններում, նշանակում է` ինքն այլևս քաղաքականությունում անելիք չունի: Սարգսյանը վստահություն է հայտնել նաև, որ ՀՀԿ-ն հաղթելու է:

Շարմազանովը նշեց, որ նորմալ է գնահատում Սարգսյանի մոտեցումները և դրանք քաղաքագիտական առումով շատ ճիշտ են: «Ցանկացած կուսակցության նախագահ, այն էլ` իշխող կուսակցության, այն էլ` ամենաազդեցիկ քաղաքական ուժի նախագահը, բնականաբար, պետք է իր կարծիքը հայտնելու իրավունք ունենա, և նրա այդ կարծիքն օբյեկտիվ է: Կարող է փոքրամասնության դուրը գալ կամ չգալ, բայց փաստն այն է, որ այսօր Հայաստանի ամենաազդեցիկ քաղաքական ուժը շարունակում է մնալ ՀՀԿ-ն»,- ասաց նա՝ հավելելով, որ շուտով Գյումրիում և Վանաձորում ընտրություններ են, և պարզ կլինի, թե ում որքան ձայն կտան ընտրողները:

«Մեր սիրելի դահլիճում բարձր տոնով հայտարարություններ անողների կուսակցություններին կտեսնենք քանի հոգի ձայն կտա: Չեմ ասում` քանի տոկոս, ասում եմ` քանի հոգի: Կուսակցության ռեյտինգը սոցիալ-հոգեբանական կատեգորիա է, և այդ առումով պարոն նախագահի խոսքը քաղաքագիտական առումով տրամաբանական էր, օբյեկտիվ էր և ընդունելի»,- ընդգծեց նա, ապա հավելեց, որ այս համատեքստում միակուսակցական համակարգի մասին խոսելը ծիծաղել է, որովհետև բոլոր քաղաքական կուսակցությունները իրավունք ունեն մասնակցելու ընտրություններին:

«Մեր հանրությունը կորոշի՝ ում է վստահում: Չեք ուզում` Սերժ Սարգսյանի գլխավորած քաղաքական ուժը ղեկավարի, ընտրեք Պողոս Պողոսյանի ղեկավարած ուժին: Ով կուզի, թող ընտրի ՀՀԿ-ին, ով կուզի, թող ընտրի «Բարգավաճ»-ին, ՀԱԿ-ին»,- ասաց Շարմազանովը:

Հարցին, թե ո՞ր պաշտոնում է տեսնում հետագայում Սերժ Սարգսյանին, որովհետև նա բացառել է ԱԺ նախագահի և վարչապետի պաշտոններում իր լինելը, և արդյոք կարելի՞ է ենթադրել, որ կուսակցության նախագահի պաշտոնի մասին է խոսել Սարգսյանը, Շարմազանովը պատասխանեց. «ՀՀ նախագահ Սերժ Սարգսյանը մինչև 2018 թվականն իր ամբողջ լիազորություններով լինելու է ՀՀ նախագահ, և բերեք դանդաղ շտապենք: Կոռեկտ չէ` այսօր ես խոսեմ այդպիսի բաների մասին: Նա այժմ նախագահն է, որի պաշտոնավարման ժամկետի ավարտին դեռ երկու տարի կա»:

Դիտարկմանը, թե Սերժ Սարգսյանն արդեն իսկ ասել է, որ ՀՀԿ-ի հաղթելու դեպքում տեսնում է իրեն քաղաքականությունում, իսկ չհաղթելու դեպքում՝ ոչ, Շարմազանովը արձագանքեց. «Օրը կգա, բարին հետը, մի՛ շտապեք: Հարցը տվել են, նա էլ պատասխանել է: Շատ տրամաբանական է եղել: Նույն Շառլ դը Գոլը, երբ իր առաջարկած սահմանադրական բարեփոխումները չանցան, հրաժարական տվեց: Նախագահի ասածը օբյեկտիվ է և տրամաբանական»: