Քրիստոսն է ձեր արեգակը, որ ձեզ ուղեկցեց ու սատարեց հատկապես մեծագույն փորձությունների պահին. Հռոմի պապ

Էջմիածնի Մայր Աթոռ սուրբ տաճարում Հռոմի պապը կարդաց իր ողջույնի խոսքը:

«Հուզմունքով ոտք դրեցի ձեր հողին: Շնորհակալ եմ, որ  կարողացա մոտենալ Սուրբ սեղանին, որից Քրիստոսի լույսը սփռվեց Հայաստանում: Շնորհակալություն հաճելի հրավերի համար, շնորհակալություն բոլորին սրտագին և ցնծալի ընդունելության համար, որ ինձ պարգևեցիք»,- ասաց նա:

Ֆրանցիսկոս պապը նշեց, որ խոնարհվում է Տիրոջ ողորմության առաջ, որ կամեցավ` հայ ազգը լինի առաջինը, ով ընդունեց քրիստոնեությունը: Հռոմի պապի մեկնաբանությամբ` հավատը Հայաստանի համար չի եղել զգեստ, որը կարելի է հանել ու հագնել հարմար պարագաներում, այլ հայ ժողովրդի լինելիության բաղկացուցիչ մասը: Նա արժևորեց հայ և կաթողիկե եկեղեցիների` երկխոսության միջոցով գոհության սեղանը լիարժեք կիսելու պատրաստակամությունը:

«Սուրբ Հոգին թող օգնի իրականացնել այն միությունը, որի համար աղոթեց մեր Տերը: Քրիստոս է ձեր փառքը, ձեր արեգակը, որ ձեզ ուղեկցեց ու սատարեց հատկապես մեծագույն փորձությունների պահին: Թող Տերն օրհնի ձեզ հավատի այս վկայության համար»,- ասաց Հռոմի պապը: