Սյունիքի Ծղուկ գյուղում հիդրոէներգակասկադ կառուցող ՍՊԸ-ն 3տարով կազատվի ներմուծման ապրանքների ԱԱՀ-ից

Կառավարության վաղվա նիստի օրակարգում էկոնոմիկայի նախարարությունը ներառել է որոշում, այն է`  կառավարության սահմանած կարգով ընտրված «Խաչատրյան Եղբայրներ» ՍՊԸ-ի  կողմից իրականացվող ներդրումային ծրագրի շրջանակներում` 2016 թվականի մայիսի 12-ից մինչև 2016 թվականի օգոստոսի 31-ը ներառյալ, ներմուծվող ապրանքների` մաքսային և հարկային մարմինների կողմից հաշվարկվող ԱԱՀ  վճարման ժամկետը հետաձգվում է ներմուծման հայտարարագրման օրվանից հաշված 3 տարի ժամկետով:

Ներդրումային ծրագրի շրջանակներում «Խաչատրյան Եղբայրներ» ՍՊ ընկերության նպատակն է ՀՀ Սյունիքի մարզի Ծղուկ համայնքում կառուցել 4 ՄՎտ փոքր հիդրոէներգակասկադ, օգտագործելով նշված տարածքի գետերի պոտենցիալը` արտադրելով էլեկտրոէներգիա:  «Խաչատրյան Եղբայրներ» ՍՊԸ-ն  նախատեսում է ներդրումներ իրականացնել շուրջ 1.9 մլրդ ՀՀ դրամի չափով, որից մոտ 489 մլն ՀՀ դրամը սարքավորումներ ձեռք բերելու համար: Ներդրումային ծրագրի իրագործման արդյունքում կստեղծվի մոտ 14 աշխատատեղ` միջին աշխատավարձը կազմելով 2016թ.– 120, 2017թ.- 130 և 2018թ.-140 հազ. դրամ: