Իշխանությունը լա՞վն է, թե՞ վատը՝ կասի ժողովուրդը մեկ տարի անց. Շարմազանով

Այսօր ԱԺ փոխխոսնակ Էդուարդ Շարմազանովը, անդրադառնալով կոռուպցիայի դեմ պայքարին, նշեց՝ կոռուպցիայի դեմ պայքարը երեկ չէ, որ սկսվել է, և այսօր կամ վաղը չէ, որ պետք է ավարտվի: Ըստ նրա` կոռուպցիան լրջագույն մարտահրավեր է մեզ համար: «Մեկ անգամ չէ, որ ասել ենք` իշխանությունն ունի քաղաքական կամք` լուծելու այդ խնդիրները, դա փաստ է: Կարևոր է, որ իշխանությունն ինքը գիտակցել է, որ Հայաստանում կան մի քանի մարտահրավերներ, և այդ մարտահրավերներից մեկը կոռուպցիան է»,- ասաց Շարմազանովը:

Նրա կարծիքով` կոռուպցիայի դեմ պայքարի արդյունքները չեն կարող շատ վաղ տեսանելի լինել, այդ պայքար երկարատև պրոցես է, և պետք է հետևողական աշխատել այդ ուղղությամբ:

Շարմազանովը նշեց նաև, որ հարկային օրենսգրքի վերաբերյալ կարծիքներն իրենց կուսակցությունում միանշանակ չեն, և դա նորմալ է: «Դա ներկուսակցական ժողովրդավարություն է, բազմակարծություն, իսկ ներկուսակցական ժողովրդավարությունը մենք խրախուսում ենք»,- ասաց նա:

ԱԺ փոխխոսնակը կարծում է նաև, որ հարկային օրենսգիրքն առաջին ընթերցմամբ կընդունվի: «Դրանից հետո երկու ամիս կա, կառավարությունը պատգամավորների հետ կաշխատի, կբարելավի, և մենք կընդունենք օրենք, որը կբխի մեր պետության և քաղաքացիների շահերից»,- ասաց նա:

Շարմազանովի խոսքով` պետք չէ  վախենալ բազմակարծությունից, դեբատներից, և նա մտավախություն չունի, որ կարծիքների բախումից կառաջանա ներկուսակցական խնդիր: Շարմազանով շեշտեց, որ իշխանությունն ամուր է, համախմբված է Սերժ Սարգսյանի շուրջը, և իշխանությունը քայլ առ քայլ իրականացնում է իր վրա դրած պարտականությունները, իսկ լավ, թե` վատ, դա կասի ժողովուրդը մեկ տարի անց` խորհրդարանական ընտրություններին: