ՖԻԴԵ-ի նախագահն առաջարկել է Հայաստանին ու Ադրբեջանին` շախմատ խաղալ

ՖԻԴԵ-ի նախագահ Կիրսան Իլյումժինովն առաջարկել է ֆեդերացիայի հովանու ներքո անցկացնել շախմատի ինտերնետային մրցաշար Հայաստանի ու Ադրբեջանի միջև. հայտնում է РИА Новости-ն: Գաղափարի հիմքում այն է, որ շախմատը նպաստում է փոխըմբռնմանը:

Իլյումժինովն առաջին հերթին իր առաջարկն ուղղել է Հայաստանի նախագահ Սերժ Սարգսյանին, ով, նրա խոսքերով, մեծ հաճույքով ընդունել է այն:

«Ադրբեջանի ղեկավարության հետ կհանդիպեմ մայիսի 24-ին Բաքվում և կառաջարկեմ այս նախաձեռնությունը` «երկիրը երկրի դեմ», որ Հայաստանն ու Ադրբեջանը կոլեկտիվ շախմատ խաղան, որ ամեն ցանկացող կարողանա մասնակցել խաղին` քայլ անելով ինտերնետում»,- ասել է Իլյումժինովը Sputnik Армения ռադիոկայանի եթերում` հավելելով, որ բոլոր խնդիրները պետք է լուծել խաղաղ ճանապարհով, որպեսզի «մենամարտեն միայն շախմատային տախտակի շուրջ»:

Ի դեպ, հերթական Շախմատային համաշխարհային օլիմպիադան անցկացվելու է Բաքվում այս տարվա սեպտեմբերի 1-14-ը:

Երեկ ՖԻԴԵ-ի նախագահը Երևանում մանկապատանեկան շախմատային դպրոցի բացման ժամանակ Հայաստանի նախագահի հետ բլից խաղ է ունեցել, որն ավարտվել է ոչ-ոքի:

«Սերժ Ազատովիչը ուժեղ խաղացող է, ուժեղ շախմատիստ, որը խորությամբ գիտի տեսությունը, և պատահական չէ, որ նրա ղեկավարությամբ շախմատի ազգային հավաքականը երեք անգամ օլիմպիական մեդալներ է նվաճել Շախմատի համաշխարհային օլիմպիական խաղերում: ՖԻԴԵ-ի անդամ երկրների նախագահների թվում Սարգսյանը չեմպիոն է, իսկ այդ երկրները 187-ն են»,- ասել է Իլյումժինովը: