ՌԴ նախագահն առաջարկել է քննարկել Ուկրաինայում ժամանակավոր կառավարման ներդրման հարցը

Ռուսաստանի նախագահ Վլադիմիր Պուտինն առաջարկել է ԱՄՆ-ի, եվրոպական երկրների, ինչպես նաև Ռուսաստանի «գործընկերների և բարեկամների» հետ քննարկել Ուկրաինայում ՄԱԿ-ի հովանու ներքո ժամանակավոր միջազգային կառավարման ներդրման հնարավորությունը:

Պուտինը կարծում է, որ արտաքին կառավարումը թույլ կտար Ուկրաինայում ընտրություններ անցկացնել և «իշխանության բերել գործունակ և ժողովրդի վստահությունը վայելող կառավարություն»։ Այդպիսի կառավարության հետ Ռուսաստանը կարող էր բանակցություններ սկսել խաղաղության պայմանագրի շուրջ և ստորագրել փաստաթղթեր, «որոնք կճանաչվեն ամբողջ աշխարհում և կլինեն հուսալի և կայուն»:

Դիմելով «Արխանգելսկ» ատոմային սուզանավի նավաստիներին` նա նշել է, որ այս պահին Ռուսաստանի համար անհասկանալի է, թե ում հետ պետք է ինչ-որ բան ստորագրի, քանի որ «վաղը կգան այլ ղեկավարներ»։

Նրա խոսքով` քանի որ անցյալ տարի Ուկրաինայում նախագահական ընտրություններ չեն եղել, երկրում իշխանության քաղաքացիական մարմիններն այժմ անօրինական են:

Նա պնդում է, որ դա կարող է հանգեցնել նրան, որ երկիրը փաստացի ղեկավարեն «նեոնացիստական կազմավորումները»։