Ինչո՞ւ ենք բանակցությունների ընթացքի մասին տեղեկանում Սարգսյանի մամուլի քարտուղարից. ադրբեջանցի քաղաքագետ

Ինչո՞ւ Ադրբեջանի նախագահի մամուլի քարտուղարի և մամուլի ծառայության առկայության պարագայում ադրբեջանական մամուլն ու փորձագետները ստիպված էին տեղեկություններ քաղել հայկական լրատվամիջոցներից: «Ինչո՞ւ ենք Վիեննայում նախագահների բանակցությունների ընթացքի ու արդյունքների մասին տեղեկանում հայ նախագահի մամուլի քարտուղարից» ,- հaqqin.az-ի` հարց է բարձրացնում ադրբեջանական «Ատլաս» քաղաքական հետազոտությունների կենտրոնի ղեկավար Էլհան Շահինօղլուն` մեկնաբանելով Վիեննայում տեղի ունեցած հանդիպումը:

Ըստ նրա` իշխանության առաջին տարիներին Իլհամ Ալիևը հանդիպումների գնալիս լրագրողների էր տանում հետը, սակայն հետագայում հրաժարվեց ամբողջ աշխարհում ընդունված այդ տեխնոլոգիայից:

Հիշեցնենք, որ սա առաջին դեպքը չէ, երբ ադրբեջանցիները դժգոհում են սեփական երկրի նախագահի լրատվական ծառայության աշխատանքից: Երեկ էլ հանդիպման մասին ադրբեջանական ԶԼՄ-ները նյութեր էին տալիս՝ հղում կատարելով հայկական եւ ռուսական ԶԼՄ-ներին, նաեւ` նախագահ Սարգսյանի մամուլի քարտուղարի թվիթերյան էջին: