Գիտեն, որ մերոնք պատրաստվել են և կսատկացնեն իրենց, դրա համար էլ հիմա չեն հարձակվի

Ապրիլի 1-ին, երբ ղարաբաղա-ադրբեջանական սահմանին սկսվեց պատերազմը, մեկ օրում ամբողջ երկիրը վերածվեց հայրենիքի. այսօր լրագրողների հետ զրույցում ասաց քանդակագործ Ֆերդինանտ Առաքելյանը:

Ըստ նրա` այս ամենից հետո մնում է միայն, որ իշխանությունը սիրի ժողովրդին և հակառակը, միայն այսկերպ կարող ենք հաղթել:

«Երեխաները մեզ սովորեցրին, հասկացրին, որ մենք սխալ ենք, քանի որ մենք մինչ այդ ապրում էինք` արձաններ քանդելով, պղծելով մեր մշակութային արժեքները: Հիմա իշխանությունը պետք է ամեն ինչ անի` զոհված զինծառայողների ընտանիքների սոցիալական հոգսը թեթևացնելու համար»,- ասաց Առաքելյանը:

Նրա կարծիքով` հիմա պետք է նաև պատասխան տրվի մի շարք հարցերի, որոնք առաջանում էին այդ օրերին: Զինված ուժերում որոշներին պաշտոններից ազատելով, քանդակագործի հավաստմամբ,  հարցին լուծում չի տրվի, նրանք պետք է նաև պատասխան տան, պատասխանատվության ենթարկվեն:

Առաքելյանը նշեց նաև, որ վստահ է` հակառակորդը հիմա չի հարձակվի, քանի որ գիտի` մերոնք պատրաստվել են: «Նրանք շատ խորամանկ են: Դե, թող հիմա հարձակվեն: Չէ՛, գիտեն, որ մերոնք կսատկացնեն»,- ասաց նա: