Կողմերը պիտի անհապաղ ձեռնամուխ լինեն համակողմանի լուծմանն ուղղված բանակցությունների. Ջեյմս Ուորլիք. 1in.am

Միացյալ Նահանգները չի ճանաչում Լեռնային Ղարաբաղը: Արցախի կարգավիճակի հարցը պիտի լուծվի հիմնախնդրի համակողմանի լուծման շրջանակում: Այսպիսի պատասխան է տվել ԵԱՀԿ Մինսկի խմբի ամերիկացի համանախագահ, դեսպան Ջեյմս Ուորլիքը «Առաջին լրատվական»-ի հարցին, թե ի՞նչ դիրքորոշում ունի Վաշինգտոնը Արցախի ճանաչման շուրջ վերջին զարգացումների, մասնավորապես՝ Հայաստանի Հանրապետության կառավարության օրակարգում Արցախը ճանաչելու մասին օրինագիծը ընդգրկելու վերաբերյալ:

«Միացյալ Նահանգները, ինչպես և միջազգային հանրության մյուս սուբյեկտները, չի ճանաչում Լեռնային Ղարաբաղը: Լեռնային Ղարաբաղի կարգավիճակի հարցը կլուծվի համակողմանի լուծման շրջանակում: Մենք կողմերին հորդորում ենք շիտակ մղումներով վերադառնալ բանակցային սեղանի շուրջ, որպեսզի հասնենք տևական կարգավորման»,- նշել է Մինսկի խմբի ամերիկացի համանախագահը:

Հարցին՝ ինչպե՞ս կմեկնաբանի ամերիկացի սենատոր Մարկ Քիրքի հայտարարությունը, որ ադրբեջանական ագրեսիայի ցանկացած ակտ այսուհետ ուժեղացնելու է այն փաստարկները, որ ԼՂՀ-ն պիտի շարժվի Կոսովոյի ճանապարհով, Ջեյմս Ուորլիքը պատասխանել է. «Սենատոր Քիրքի ասածի հետ կապված բոլոր հարցերը մենք կուղղեինք սենատորի աշխատակազմին: Մեր դիրքորոշումն այն է, որ կողմերը պետք է խստիվ պահպանեն հրադադարը և անհապաղ ձեռնամուխ լինեն համակողմանի լուծմանն ուղղված բանակցությունների»: