ԼՂՀ հարցով բանակցությունների ընթացքը` ըստ Ռազմիկ Դավոյանի

Որոշ տարածքներ կարելի է վերադարձնել, եթե Ղարաբաղն անկախ կարգավիճակ ձեռք բերի. այսօր՝ լրագրողների հետ հանդիպման ժամանակ, ասաց բանաստեղծ Ռազմիկ Դավոյանը: Սակայն, նրա կարծիքով, դրանք չպետք է լինեն այն տարածքները, որոնց վերադարձմամբ Հայաստանի անկախությանը վտանգ կսպառնա: «Բայց այդ ամենից հետո էլ ես Ադրբեջանի խաղաղվելուն չեմ հավատում, քանի դեռ Ալիևի որովայնը շարունակում է ներքաշել նավթային փողերը»,- նշեց Դավոյանը:

Բանաստեղծ Խաչիկ Մանուկյանն էլ ասաց, որ չի ուզի, որ որևէ մետր անգամ վերադարձնենք: Ավելին՝ ըստ նրա, դեռ տարածքներ կան, որոնք պետք է մեզ վերադարձնենք:

«Յուրաքանչյուր հետ վերադարձված մետրն անգամ մեր խեղճությունը ցույց կտա, իսկ մենք խեղճ չպետք է լինենք: Դժվար է ասել` այո, պետք է ինչ-որ տարածք վերադարձնենք կամ էլ հակառակը պնդել, քանի որ դիվանագետները, կարծում եմ, ավելի լավ են տեսնում ամեն ինչ: Սակայն պետք է ասել, որ չէի ուզենա հայկական բանակն այլևս կորուստներ կրի. տղաս էլ այժմ սահմանին է կանգնած»,- ասաց Մանուկյանը: