Թուրքիան պետք է հեռու մնա ԼՂ հակամարտությունից. Նալբանդյան

Եթե Թուրքիան իսկապես ցանկանում է Լեռնային Ղարաբաղի հակամարտության կարգավորում, նրան հարկավոր է հնարավորինս հեռու մնալ այդ գործընթացից. ռուսական Коммерсантъ-ին տված հարցազրույցում հայտարարել է ՀՀ ԱԳՆ ղեկավար Էդվարդ Նալբանդյանը:

- Ինչպե՞ս են Ռուսաստանի և Թուրքիայի հարաբերություններում բարդություններն անդրադառնում ԼՂ շուրջ  իրավիճակի վրա: Ինչպե՞ս եք գնահատում թուրքական կողմի խոստումները` «ամեն ջանք գործադրել Ադրբեջանի օկուպացված տարածքներն ազատագրելու համար»:

- Վերջին շրջանում այնպիսի տպավորություն է ստեղծվում, որ թուրքական ղեկավարությունը կորցնում է իրականության զգացումը և ոչ միայն արտաքին, այլև ներքաղաքական հարցերում:

Թուրքիայի վարչապետ Ահմեդ Դավութօղլուն հայտարարում է, որ այսօր քրդերը համագործակցում են Ռուսաստանի հետ ճիշտ այնպես, ինչպես 20-րդ դարում նրա հետ համագործակցում էին «հայկական ավազակախմբերը»։  20-րդ դարի սկզբին Հայոց ցեղասպանության պարագլուխներից մեկը՝ Թալեաթ փաշան, նույնպես ՌԴ-ին մեղադրել էր հայերին զինելու մեջ: Ակնհայտ է, որ հարյուր տարվա ընթացքում շատ բան չի փոխվել Թուրքիայի իշխանական վերնախավում: