Հայաստանում գեղասահքը զարգացնելու համար լավ աշխատանք է տարվում. Ռոդնինա

Ռուս լեգենդար գեղասահորդուհի,  օլիմպիական եռակի չեմպիոն, աշխարհի ու Եվրոպայի, ինչպես նաեւ   ԽՍՀՄ բազմակի չեմպիոն Իրինա Ռոդնինան այսօր հանդիպում ունեցավ լրագրողների հետ:

«Հայաստան այցելությունն ինձ համար շատ հաճելի է: Ցանկությունս մեծ է` ավելի լավ ճանաչել Հայաստանը: Ես եղել եմ գեղասահքի նորաբաց մարզադպրոցում, որն իմ անունով է կոչվել: Տեսա, թե ինչպես են այնտեղ մարզվում երեխաները,  եւ  ինչպես է աշխատում մարզադպրոցը:   Մարզչական խորհրդի հետ քննարկել ենք  դասընթացներ անցկացնելու հարցը: Կազմակերպելու ենք սեմինարներ մարզիչների ու մարզիկների համար: Մենք պետք է հնարավորություն տանք  բոլորին, ովքեր ցանկանում են գեղասայքով զբաղվել թեկուզ  սիրողական մակարդակով, կարողանան կանգնել չմուշկների վրա ու սահել սառույցի վրա, որից հետո կկարողանանք նրանց միջից ընտրել հեռանկարային մարզիկների: Այն, ինչ տեսա մարզադպրոցում, ինձ շատ դուր եկավ: Լավ աշխատանք է տարվում»,- ասաց անվանի մարզիկը:  

Խոսելով Հայաստանում մարզաձեւի հեռանկարների մասին` Ռոդնինան ասաց. «Այստեղ շատ տաղանդավոր երեխաներ կան, եւ մոտ է այն պահը,  որ Հայաստանը մեծ սպորտին անվանի գեղասահորդներ տա:  Ես չեմ կարող նայել մարզիկին եւ ասել` երբեւէ կդառնա նա օլիմպիական չեմպիոն, թե ոչ, բայց կարող եմ ասել, թե ինչ պոտենցիալ ունի եւ որքան կարող է աճել:  Այստեղ արդեն կան մարզվելու համար անհրաժեշտ պայմանները, պարզապես հարկավոր է ճիշտ եւ հետեւողական աշխատանք տանել»: