Անալոգային հեռարձակումն անջատելուց 10 օր առաջ տեղյակ կպահեն հասարակությանը

Անալոգային հեռարձակումը կշարունակվի այնքան ժամանակ, քանի դեռ բոլոր անապահովներին չեն բաժանվել թվային հեռարձակման համար նախատեսված սարքերը. այսօր լրագրողներին հայտնեց «Հայաստանի հեռուստատեսային եւ ռադիոհաղորդիչ ցանց» ՓԲԸ-ի գլխավոր տնօրեն Գրիգոր Ամալյանը` հավելելով, որ անալոգային հեռարձակումն անջատելուց տասը օր առաջ տեղյակ կպահեն հասարակությանը:

Ըստ նրա` հեռուստատեսության թվայնացումից խուսափել ուղղակի հնարավոր չէր, քանի որ թվային հեռարձակման անցնելը միայն հայաստանյան ներքին պրոցես չէր, Հայաստանն ինքն իրեն չէր որոշել անցնել դրան:

«Խնդիրն այն է, որ աշխարհը վաղուց անցել է թվային հեռարձակման, և եթե ՀՀ քաղաքացին փորձեր անալոգային հեռուստացույց գնել, մենք հաղորդիչ կայանների հետ խնդիր կունենայինք: Բացի այդ` այլևս անալոգային սարքեր չեն արտադրվում, և մենք մի շարք խնդիրների առջև էինք կանգնելու: Որևէ մեկը դժվար կարողանա գտնել անալոգային հեռուստացույց, որն արտադրվել է 2015-ին, հիմա միայն թվային են արտադրում, ուստի մենք անալոգային հեռարձակման ժամկետը երկարացնելու այլընտրանք չունեինք»,- ասաց Ամալյանը` հավելելով, որ առանց այն էլ նախատեսվածից /2015-ի հունիս/ երկարաձգվել է ժամկետը:

Ըստ նրա` Հայաստանին տրվել է այդ հնարավորությունը` հաշվի առնելով այն հանգամանքը, որ սոցիալապես անապահով խավը չի կարող սարքը գնել: Պետբյուջեի հատկացումների միջոցով արդեն 48 737 ընդունիչ սարք է գնվել` անապահով ընտանիքներին բաժանելու համար: Ի դեպ, դրանցից 2000-ն ուղարկել են Արցախ:

«Բացի Երևանի, Վայոց ձորի և Արմավիրի մարզերից, մյուս բոլոր մարզերում արդեն ավարտվել է հաղորդիչ սարքերի բաժանումը: Այս սարքեր են բաժանումը Վայոց ձորում: Ինչ վերաբերում է անալոգային հեռարձակման անջատման փուլին, ապա երբ կստանանք համապատասխան փաստաթուղթը, որ բոլոր սարքերը բաշխված են, նոր միայն կանջատենք այն»,- ասաց Ամալյանը: