Եթե կան ավելորդ հաստիքներ, ապա դրանք պետք է կրճատվեն. Արմեն Երիցյան

Այսօր լրագրողները ՏԿԱԻ նախարար Արմեն Երիցյանից հետաքրքրվեցին, թե ճի՞շտ են խոսակցությունները, որ կառավարությունում հաստիքներ պետք է կրճատվեն: Նախարարը հաստատեց, որ եթե իր նախարարությունում կան հաստիքներ, որոնք ավելորդ են, ապա պատրաստ են կրճատել:

Նա միաժամանակ հերքեց եզրակացությունը, թե ուռճացված է ապարատը, պարզապես, նրա խոսքով,  պետք է կրճատվեն մի քանի հաստիքներ, որ հնարավոր լինի մնացած աշխատողների աշխատավարձերը բարձրացնել:

Հարցին, թե հնարավո՞ր է, որ ՏԿԱԻ նախարարությունը միացվի այլ նախարարության, Արմեն Երիցյանը  դժվարացավ պատասխանել` ասելով, որ  դա միայն վարչապետի որոշելու հարցն է:

Ինչ վերաբերում է մամուլի այն հրապարակումներին, թե իր և մարզպետերի հարաբերությունները լավ չեն, քանի որ մարզպետերը հրաժարվում են ենթարկվել նախարարին, Արմեն Երիցյանը նույնպես հերքեց` ասելով, որ չի կարող այնպես լինել, որ մարզպետերը չկատարեն իր հանձնարարությունները: