«Կուկուռուզնիկ»-ի վայրում նորմերին անհամապատասխան շինություններ կառուցողները խիստ կպատժվեն. նախարար

Արդեն հայտնել ենք, որ քաղաքաշինության նախարար Նարեկ Սարգսյանն այսօր ամփոփեց տարին:

Նա նշեց, որ 2014 թվականի դեկտեմբերի 1-ին  համաձայնագիր է ստորագրվել «Հին Երևան» կառուցապատման ներդրումային ծրագրի վերաբերյալ:

Նախարարը հայտնեց նաև, որ անցնող տարվա ընթացքում Երևանում շահագործման են հանձնվել ամենատարբեր նշանակության շենքեր՝ հյուրանոցներ, Հայոց ցեղասպանության թանգարանը, սառցադաշտը: Սարգսյանի խոսքով` Ֆիրդուսի կամ 33-րդ թաղամասի ներդրումային-քաղաքաշինական ծրագրի շրջանակներում  հաջողվել է բանակցել մի շարք օտարերկրյա ներդրողների հետ:

Պատասխանելով հարցին, թե, ի վերջո, ի՞նչ է  կառուցվելու Երիտասարդական պալատի` հայտնի «Կուկուռուզնիկի» վայրում, քաղաքաշինության նախարարը նշեց, որ գոնե հաջորդ տարվա համար հստակ մշակված նախագիծ չկա: «Մի բան է հայտնի` մենք խիստ պատժամիջոցներ ենք սահմանել այն կառուցապատողների համար, ովքեր կփորձեն այդ և նշված մի շարք այլ տարածքներում ընդունված նորմերին անհամապատասխան շինություններ բարձրացնել»,- ասաց Սարգսյանը:

Նախարարն առանձնացրեց նաև այն հանգամանքը, որ «Երևանի փոքր կենտրոնի կառուցապատման մասին» ՀՀ օրենքի նախագիծը հաստատվել է ՀՀ կառավարության կողմից, որի կարևոր նպատակներից է Փոքր կենտրոնի գերուրբամիզացման միտումների կանխարգելումը` քաղաքաշինական, հողօգտագործման, ինչպես նաև ֆինանսական, տնտեսական լծակների օգտագործմամբ այնպիսի պայմանների սահմանման միջոցով, որոնք թույլ կտան կառուցապատողների  նախաձեռնություններն ուղղել Երևանի այլ տարածքներ: