ՎՊ-ն կարող է վերահսկողության տակ պահել լավագույն դեպքում բյուջեի ծրագրերի ծախսային մասի 10 տոկոսը

Այսօր ԱԺ արտահերթ նիստի վերջում, երբ խորհրդարանում շատ քիչ պատգամավորներ էին մնացել, քննարկման դրվեց Վերահսկիչ պալատի 2015թ հաշվետվությունն ու 2016 թ տարեկան ծրագիրը: Այն ներկայացնում էր ՎՊ նախագահ Իշխան Զաքարյանը: Սկզբում նա ներկայացրեց 2016 թվկանի տարեկան ծրագիրը:

Նրան հարց տալու համար ընդամենը մեկ պատգամավոր էր հերթագրվել` ԱԺ ԲՀԿ խմբակցության պատգամավոր Միքայել Մելքումյանը: Նա նախ ասաց, որ հարգում է Իշխան Զաքարյանին` որպես փորձառու պաշտոնյա: «Անկեղծ պատասխանեք, իմ հարցը քաղաքական ենթատեքստ չունի, ուղղակի մասնագիտական ենթատեքստ ունի: Երկու տարի առաջ դուք հնչեցրեցիք ռիսկերի մասին, մոտ 700 միլիարդ դրամի մասին էր խոսքը, դա մեծ հնչեղություն ունեցավ, դրանից հետո Դուք ակտիվ չէիք գալիս ԱԺ: Այս ընթացքում պետական միջոցները ծախսելու արդյունավետության մակարդակը բարձրացե՞լ է, թե՞ ոչ, գործերը լավացել ե՞ն մեր երկրում, թե՞ ոչ»,- հարցրեց պատգամավորը:

Իշխան Զաքարյանը պատասխանեց, որ կարող է արդյունավետության գնահատական տալ առանձին ծրագրերի հետ կապված, սակայն ՎՊ-ն լավագույն դեպքում կարող է վերահսկողության տակ պահել բյուջեի ծրագրերի ծախսային մասի 10 տոկոսը: