Արցախում վիրավորված զինծառայողի սրտին վտանգ չի սպառնում. կտեղափոխեն այլ հիվանդանոց

Հակառակորդի հրետակոծության հետևանքով դեկտեմբերի 5-ին ականապայթյունային վիրավորում ստացած ՊԲ զինծառայող` 20-ամյա Վարազդատ Խաչատրյանի վիճակը գնահատվում է միջին ծանրության, թեև դեռևս գտնվում է հիվանդանոցի վերակենդանացման բաժանմունքում: Այս մասին yerkir.am-ի հետ զրույցում հայտնեց «Նորք-Մարաշ» սրտաբանական բժշկական կենտրոնի բուժգծով փոխտնօրեն Կարեն Խաչիյանը:

Ըստ նրա` երեկ կատարված հետազոտությունները ցույց են տվել, որ զինծառայողի սրտին և խոշոր անոթներին վտանգ չի սպառնում, այժմ քննարկվում է մյուս օրգան-համակարգերի հետագա բուժումն այլ կլինիկայում իրականացնելու հարցը: Փոխտնօրենը նաև տեղեկացրեց, որ երեկ զինծառայողն այլ հիվանդանոցում հետազոտության է ենթարկվել և դարձյալ բերվել իրենց մոտ:

Նշենք, որ հնարավոր է Վարազդատ Խաչատրյանին կրկին տեղափոխեն Կենտրոնական կլինիկական հոսպիտալ:

Հիշեցնենք, որ ՊԲ զինծառայողը ստացել էր հրազենային բեկորային, ստորին և վերին վերջույթների վնասվածքներ: Առկա է ոսկրերի կոտրվածք, այլ վնասվածքներ: Դեկտեմբերի 7-ին զինծառայողը տեղափոխվել էր «Նոր-Մարաշ» սրտաբանական կենտրոն` նեղ մասնագիտական բուժում ստանալու: