Երևանում Արա Գյուլերի տուն-թանգարան կբացվի

Պոլսահայ հայտնի լուսանկարիչ Արա Գյուլերի տուն-թանգարան կբացվի Երևանում. հայտնում է «Արևելքը»՝ Պոլսում իր աղբյուրներին հղումով:

Այս տեղեկությունները Սևծովյան տնտեսական համագործակցության կազմակերպությունում Հայաստանի մշտական ներկայացուցիչ Արմեն Ավագյանին անձամբ հաղորդել է պոլսահայ լուսանկարիչը:

Ըստ աղբյուրի՝ Ավագյանը երեկ Պոլսի Գալաթասարայի շրջանում գտնվող և մեծ վարպետի սեփականությունը հանդիսացող «Արա կաֆե»-ում հանդիպել է Արա Գյուլերի հետ և Հայաստանի կառավարության անունից նրան հաղորդել տուն-թանգարան կառուցելու որոշման մասին:

Հիշեցնենք, որ Արա Գյուլերն իր 70-ամյա ֆոտոարխիվը` հեղինակային իրավունքներով, հանձնել էր թուրքական իշխանություններին մոտ կանգնած «Դողուշ» հոլդինգին, սակայն օրեր անց նա չեղարկել էր հոլդինգի հետ իր պայմանագիրը:

Իսկ 2013-ին, երբ Հայաստանի ազգային պատկերասրահում բացվել էր Գյուլերի լուսանկարների ցուցադրությունը, լուսանկարիչն այդ բոլոր աշխատանքները նվիրել էր պատկերասրահին, որոնք այժմ ընդգրկված են պատկերասրահի հիմնական ցուցադրությունում: