Թևոս Սաֆարյանը հրաժարվել է ցուցմունք տալ

Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվեց քրեական հեղինակություն Կայարանցի Թևոսիկի՝ Թևոս Սաֆարյանի եղբոր՝ Արթուր Սաֆարյանի սպանության գործով հերթական դատական նիստը:

Այսօրվա նիստում գործով տուժողի իրավահաջորդի ներկայացուցիչ Երեմ Սարգսյանը հայտարարեց, որ գործով տուժող Արթուր Սաֆարյանի որդին՝ Թևոս Սաֆարյանը, օգտվելով իր դատավարական իրավունքից, հրաժարվել է դատարանում ցուցմունք տալ: Նշենք, որ վկան իրավունք ունի հրաժարվելու իր մերձավորի մասին ցուցմունք տալուց, իսկ այս դեպքում գործով տուժողը նրա հայրն է:

Այսօրվա դատական նիստում ցուցմունք տվեց կալանքի տակ գտնվող վկա Ռազմիկ Ավետիսյանը: Նա շուրջ 10 ամիս է` գտնվում է կալանքի տակ Նորք-Մարաշում զույգ երեխաների մահվան պատճառ դարձած վթարի գործով: Դատարանում պարզվեց, որ Ավետիսյանը, ըստ քննության տվյալների, Արթուր Սաֆարյանին սպանած, այնուհետև Իսրայել Սարգսյանի կողմից սպանված Մովսես Ներսիսյանի ծանոթն է: Ռազմիկ Ավետիսյանը դատարանում ցուցմունք տվեց այն մասին, որ Մովսեսի հետ շինանյութի առևտրով են զբաղվել, և որ նրա հետ զուտ գործնական շփումներ է ունեցել: Վկան հայտնեց, որ լրատվամիջոցներից է տեղեկացել դեպքի մասին:

Այս նիստումն ցուցմունք տվեց նաև մի կին, ով հայտնեց, որ Մովսեսի հետ ծանոթացել է «odnoklassniki» սոցկայքի միջոցով, այնուհետև փոխանցել հեռախոսահամարն ու մի քանի անգամ հանդիպել նրա հետ սրճարանում: Վկան հայտնեց, որ Մովսեսին վերջին անգամ տեսել է երկու տարի առաջ՝ նոյեմբերին, և որ դրանից հետո նրա մասին որևէ տեղեկություն չի ստացել:

Այսօրվա նիստում կողմերը համաձայնության եկան հաջորդ դատական նիստի ընթացքում, վկաներին քննելուն զուգահեռ, հետազոտել գործում եղած ապացույցները:

Այսպիսով` այսօրվա դատական նիստը հետաձգվեց: