Ինչո՞ւ փախստականների հարցը բարդեցիք մեր գլխին. Դավութօղլու

Պաշտոնական այցով Թուրքիա ժամանած Հունաստանի վարչապետ Ալեքսիս Ցիպրասը հանդիպել է երկրի վարչապետ Ահմեդ Դավութօղլուի հետ:

Ըստ Bianet-ի՝ հանդիպման ընթացքում վարչապետերը քննարկել են փախստականների հարցը:

Համատեղ մամուլի ասուլիսի ժամանակ Դավութօղլուն հայտել է, որ Եվրոպան պետք է այդ հարցում պարտականություն ստանձնի՝ փախստականներին հաստատվելու վայրեր տրամադրելով:

«Հունաստանն ու Թուրքիան, ինչպես սիրիացի փախստականները, նույնպես տուժող կողմ են»,- ասել է Թուրքիայի վարչապետը՝ նշելով, որ Հունաստանն ու Թուրքիան փախստականների հարցով զբաղվելու երկկողմ նոր աշխատանքներ են սկսելու:

Դավութօղլուն փախստականներին անհրաժեշտ օգնություն չցուցաբերելու համար քննադատել է նաև ՄԱԿ-ի Անվտանգության խորհրդին: «Անհրաժեշտ օգնություն չցուցաբերելու պատճառով արդեն չորս տարի է՝ մարդիկ սոված-ծարավ ընկնում են ճամփա՝ ավելի ապահով վայրեր հասնելու ցանկությամբ: Հետևաբար, երբ Թուրքիային հարցնեն, թե` «այս փախստականներին ինչպե՞ս եք պահելու», մենք՝ որպես Թուրքիա և Հունաստան, շրջվելու ենք` աշխարհին  և ՄԱԿ-ի Անվտանգության խորհրդին ասենք՝ «ինչո՞ւ այս հարցը մեր գլխին բարդեցիք կամ, եթե բարդեցիք, ինչո՞ւ աչք փակեցիք այդ խնդրի վրա»:

Դավութօղլուի խոսքով՝ նրանց՝ չկայացրած որոշումների պատճառով տուժում են թե\' Սիրիան, թե\' փախստականները, թե\' Թուրքիայի և Հունաստանի նման փախստականների հարցով զբաղվող երկրները: