Ստեփանակերտի օդանավակայանը կարո՞ղ է ընդունել Ռուսաստանի կողմից Սիրիայում կիրառվող օդանավերը

Ստեփանակերտի օդանավակայանը կարող է ընդունել այն բոլոր օդանավերը, որոնք այսօր Ռուսաստանը կիրառում է Սիրիայում: Այս մասին այսօր լրագրողներին հայտնեց ԼՂՀ քաղավիացիայի նախկին պետ Դմիտրի Աթբաշյանը՝ անդրադանալով այն հարցին, թե արդյո՞ք օդանավակայանը տեխնիկապես պատրաստ է ընդունել խոշոր օդանավեր:

Աթբաշյանի խոսքով՝ Ստեփանակերտի օդանավակայանը  զինված է 4-րդ սերնդի տեխնոլոգիաներով, նաև հզոր աերանավիգացիոն համակարգ ունի, որը կապված է ՀՀ օդանավակայանների նավիգացիայի հետ, ինչը ռազմավարական մեծ նշանակություն ունի:

Հարցին, թե ի՞նչ նպատակ էր հետապնդում «Ռեգնում» գործակալության կողմից Ստեփանակերտի օդանավակայանը ահաբեկչության դեմ պայքարում ռուսական ուժերին  տրամադրելու հարցը շահարկելը, և արդյո՞ք դա իրատեսական է, նա պատասխանեց, որ դա քաղաքական հարց է, և ինքը միայն կարող է օդանավակայանի տեխնիկական հնարավորությունների մասին խոսել: ԼՂՀ քաղավիացիայի նախկին պետը միայն նշեց, որ Ստեփանակերտի օդանավակայանը, Սիրիայի առումով, աշխարհագրական բարենպաստ դիրքում է գտնվում: