Հայաստանում այս տարի կարմրուկի դեպքերը 3 անգամով ավելի են, քան 2014-ին

Հայաստանում այս տարի արձանագրվել է կարմրուկի 31 դեպք, որը 3 անգամ ավելի է, քան նախորդ տարի. այսօր լրագրողներին հայտնեց ՀՀ առողջապահության նախարարության հիվանդությունների վերահսկման և կանխարգելման ազգային կենտրոնի գլխավոր տնօրենի խորհրդական, իմունականխարգելման ազգային ծրագրի ղեկավար Գայանե Սահակյանը:

Ըստ նրա` կարմրուկի բերովի դեպքերի քանակի ավելացումը պայմանավորված է Հայաստանում տուրիզմի ակտիվացմամբ: «Իրականում 4 վարակակիր է եղել, որոնք արտերկրից վարակով եկել են Հայաստան, որոնցից էլ հետագայում վարակվել են մյուսները: Կարմրուկի առաջին դեպքը մի 4-ամյա աղջնակից է փոխանցվել, ով ծնողների հետ գնացել էր Բելգիա՝ հանգստանալու, որից հետո եկել Հայաստան ու գնացել մանկապարտեզ: Մյուս դեպքերը եկել են ՌԴ-ից, Վրաստանից և Ֆրանսիայից»,- ասաց Սահակյանը:

Նա տեղեկացրեց նաև, որ հիմնականում վարակվել էին նրանք, ովքեր չէին պատվաստվել հիվանդության դեմ: