Ավտոբուսի վթարից տուժածներից մեկը դեռ գիտակցության չի եկել

Տեղեկացրել էինք, որ Տուլայում վթարված ավտոբուսի ուղևոր՝ երկու վիրավորների վիճակը ծայրահեղ ծանր է:

Yerkir.am-ին Կիրեևսկի բուժկենտրոնից տեղեկացրին, որ իրենց մոտ է գտնվում 49-ամյա Ապրես Ասրյանը, ում երեկ կրկին վիրահատել են:

«Ասրյանը հիվանդանոց է տեղափոխվել բազմաթիվ կոտրվածքներով` գանգի հիմքի կոտրվածքներ, կողոսկրերի բազմակի կոտրվածքներ, երկու թոքերի կոնտուզիա, կոնքոսկրերի բազմաթիվ մանր կոտրվածքներ: Նրան վիրահատել էինք հենց առաջին օրը, սակայն երեկ կրկին վիրահատեցինք` կոտրված կոնքոսկրերը փորձեցինք միացնել»,- տեղեկացրին հիվանդանոցից:

Ասրյանին միացված է արհեստական շնչառության սարք: Նա, ի դեպ, առաջին իսկ օրվանից դեռ գիտակցության չի եկել:

Հիվանդանոցից տեղեկացրին նաև, թե դժվար է ասել` նրա կյանքին վտանգ սպառնո՞ւմ է, թե՞ ոչ, չնայած այն հանգամանքին, որ բժիշկներն Ասրյանի առողջական վիճակը գնահատում են որպես կայուն ծանր: