Գագիկ Բեգլարյանը ողբերգական վթարի կապակցությամբ կապ է հաստատել ՌԴ տրանսպորտի նախարարի հետ

ՀՀ տրանսպորտի և կապի նախարարությունը տեղեկացնում է, որ նոյեմբերի 3-ին, տեղական ժամանակով ժամը 03.10-ին, Ռուսաստանի Դաշնության Տուլայի  տարածաշրջանի Ուզլովսկի քաղաքի մոտ դեռևս չբացահայտված հանգամանքներում  վթարի է ենթարկվել  «Քինգ դելյուքս» ՍՊ ընկերությանը պատկանող  ավտոբուսը, որը  ոչ կանոնավոր  ուղևորափոխադրում էր  իրականացնում Մոսկվա-Երևան ուղղությամբ։ «Higer» մակնիշի 510 OP 61 պետհամարանիշով ավտոբուսը դուրս է եկել երթևեկելի մասից և շրջվել:  Վթարի հետևանքով կան զոհեր և վիրավորներ։

Դեպքի առնչությամբ Ռուսաստանի Դաշնության ՆԳ նախարարությունում կատարվում է նախաքննություն։

ՀՀ տրանսպորտի և կապի նախարար Գագիկ  Բեգլարյանն  անմիջական   կապի մեջ է ՌԴ տրանսպորտի նախարար Մաքսիմ Սոկոլովի հետ։  ՌԴ տրանսպորտի նախարարությունից տեղեկացնում են, որ իրավիճակը գտնվում է ՌԴ տրանսպորտի նախարարի և Տուլայի նահանգապետի անմիջական վերահսկողության ներքո։ 

Հիվանդանոցներում, վիրավորներին  համապատասխան բուժօգնություն են ցուցաբերում լավագույն բժիշկները։  Վիրավորներից 2-ի վիճակը ծանր է, մյուսների կյանքին, այդ թվում նաև վերակենդանացման բաժանմունքում գտնվող 10 վիրավորների,  վտանգ չի սպառնում։ Ստեղծված են համապատասխան պայմաններ, անհրաժեշտության դեպքում, կկազմակերպվի նաև վթարից տուժածների հարազատների տեղափոխումն ու դիմավորումը։