Այս գիշեր հայ-ադրբեջանական սահմանին էլ է անհանգիստ եղել

Արդեն տեղեկացրել ենք, որ անցած գիշեր ղարաբաղա-ադրբեջանական հակամարտ զորքերի շփման գծում նկատվել է հակառակորդի կողմից հրադադարի պահպանման ռեժիմի խախտումների աճ: 

Yerkir.am-ի զրույցում  Տավուշի մարզի սահմանամերձ համայնքների  ղեկավարները նշեցին, որ իրենց մոտ էլ են եղել կրակոցներ, բայց հիմնականում` դիրքերի ուղղությամբ, գյուղերին  չեն հասել: Ներքին Կարմիրաղբյուրի գյուղապետ Մանվել Կամենդատյանը նշեց, որ երեկոյան ժամերին են եղել կրակոցները, սակայն տևական չեն եղել, և գյուղը վնասներ չի կրել: Այգեպարի գյուղապետ Անդրանիկ Այդինյանն էլ նշեց, որ ժամը 20:00-ից հակառակորդը կրակել է, սակայն, բարեբախտաբար, վնասներ չկան: «Գիշերը կրակել են, հա, բայց գյուղի ուղղությամբ` չէ: Էս գիշեր մի քիչ շատ էին կրակոցները: Դիրքերի ուղղությամբ էին երեկոյան ժամերին կրակում, սակայն երկար չտևեց: Մենք միշտ էլ պատրաստ ենք այդ կրակոցներին դիմակայել ու արժանի պատասխանել»,- ասաց գյուղապետը: