Անմոռուկը հասավ իր նպատակին. Վիգեն Սարգսյան

«Հիշում եմ և պահանջում» փորձագիտական համաժողովից` Հայոց ցեղասպանության 100-րդ տարելիցի ծրագրի ընթացքի և կայացած միջոցառումների արդյունքների ամփոփումից առաջ Հայոց ցեղասպանության 100-րդ տարելիցի միջոցառումները համակարգող, ՀՀ նախագահի աշխատակազմի ղեկավար Վիգեն Սարգսյանը հայտարարեց, որ կարող ենք հստակ արձանագրել, որ անմոռուկը հասավ իր նպատակին:

«Մեկ միլիարդից ավելի մարդ հնարավորություն է ունեցել Հայոց ցեղասպանության միջոցառումներին հետևելու: Դա հսկայական թիվ է, և տարբեր միջազգային հեռուստաալիքներ նաև ուղիղ հեռարձակում էին միջոցառումների ընթացքը: Իհարկե, դա հնարավորություն տվեց շատ լայն զանգվածի ծանոթանալու միջոցառումների բովանդակությանը»,- ասաց Սարգսյանը:

Անդրադառնալով թուրք հասարակության վերաբերմունքին և արձագանքին` նա նշեց, որ Համահայկական հռչակագրում կա հստակ հղում Թուրքիայի քաղաքացիական հասարակության այն զանգվածին, որը պատրաստ է առերեսվել իր պատմության հետ:

«Ես միշտ եղել եմ այն համոզման, որ ճանաչման պայքարի գործում առանձնահատուկ նշանակություն ունի քաղաքացիական հասարակությունների դերը, և վստահ եմ, որ Թուրքիայի կողմից ճանաչումը պայմանավորված է լինելու երկրում քաղաքացիական հասարակության զարգացմամբ»,- նշեց Վիգեն Սարգսյանը:

Նրա  հայտեց նաև, որ պետական հանձնաժողով է ձևավորել, որի ղեկավարն է ՍԴ նախագահ Գագիկ Հարությունյանը: «Այդ հանձնախումբը զբաղված է Ցեղասպանության հետևանքների վերացմանն ուղղված իրավական թղթածրարի մշակմամբ: Մեծի Տանն Կիլիկիո կաթողիկոսը ներկայացրել է առաջին իրավական պահանջները»,- եզրափակեց Սարգսյանը: