Արամ Խաչատրյանի անվան 3-րդ միջազգային փառատոնը` համարձակ ծրագրով և բացառիկ հյուրերով

Հոկտեմբերի 3-ից դեկտեմբերի 5-ը արդեն 3-րդ անգամ տեղի կունենա Արամ Խաչատրյանի անվան միջազգային փառատոնը: Այն կյանքի է կոչում Հայաստանի պետական երիտասարդական նվագախումբը:

Լրագրողների հետ հանդիպման ժամանակ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը նշեց, որ այս տարի փառատոնի շրջանակներում տեղի կունենա 19 համերգ` հետաքրքիր ձևաչափով. հոկտեմբերի 3-ից յուրաքանչյուր շաբաթ օր տեղի կունենան սիմֆոնիկ, իսկ չորեքշաբթի օրերին` կամերային համերգներ:

«Փառատոնի` ամենամյա լինելն արդեն իսկ պարտավորեցնող է, քանի որ պետք է վստահ լինենք, որ կարող ենք այն կյանքի կոչել նոր հյուրերով, հետաքրքիր ծրագրով: Սա արդեն իսկ կայացած փառատոն է, որը ծառայում է մեկ գաղափարի` աշխարհին ներկայանալ Խաչատրյանի միջոցով»,- ասաց Սմբատյանն ու հավելեց, որ այսօր վստահ կարող ենք ասել նաև, որ Հայաստանը փառատոնային երկիր է, քանի որ մեզ մոտ մի շարք հիանալի փառատոներ են անցկացվում:

Նա տեղեկացրեց նաև, որ, ինչպես միշտ, այս անգամ նույնպես փառատոնը հյուրընկալել է մի շարք անվանի դեմքերի` ջութակահարներ Աննա Վինիցկայան, Իվա Միլետիչը /Խաչատրյանի անվան 11-րդ միջազգային մրցույթի մրցանակակիր/, Չադ Հուփեսը, Ալեքսանդրա Սոումը, Սուրեն Բագրատունին, Զոհրաբ Թադևոսյանը, դաշնակահարներ` Ալեքսանդր Ռոմանովսկին, Վահագն Պապյանը, դիրիժոր Ջանլուկա Մարչիանոն… Սմբատյանը նշեց` քանի որ, սովորաբար, մի փոքր անտեսվում են հայաստանյան երաժիշտները, ուստի իրենք որոշել են փառատոնի մասնակիցների կազմում ընդգրկել նաև նրանց:

Փառատոնի փակման համերգը, ըստ դիրիժորի, լինելու է աննախադեպ` ոչ միայն ձևաչափով, այլ նաև հնչողությամբ: «Դեկտեմբերի 5-ին Հայաստանի ջազ նվագախմբի հետ կհնչեն Խաչատրյանի գործերը` ջազային գործիքավորմամբ: Սա, անկեղծ ասած, շատ մեծ աշխատանք է պահանջում, բայց վստահ ենք` արդյունքը հետաքրքիր է լինելու»,- ասաց Սմբատյանը:

Համերգները տեղի կունենան Կոմիտասի թանգարան-ինստիտուտում, Արամ Խաչատրյանի տուն-թանգարանում և «Արամ Խաչատրյան» համերգասրահում: