Մեկնարկում է Արամ Խաչատրյանի անվան միջազգային մրցույթը

Այսօր` կոմպոզիտոր Արամ Խաչատրյանի ծննդյան օրը, կմեկնարկի Արամ Խաչատրյանի անվան 7-րդ միջազգային մրցույթը:

ԱՊՀ երկրների հումանիտար համագործակցության միջպետական հիմնադրամի գլխավոր տնօրեն Արմեն Սմբատյանը տեղեկացրեց, որ մրցույթն այս տարի անցկացվում է «Դաշնամուր» եւ «Կոմպոզիցիա» անվանակարգերում:

Մրցույթին մասնակցելու է 47 երաժիշտ` 36 դաշնակահար եւ 11 կոմպոզիտոր` ԱՊՀ երկրներից, Եվրոպայից, ԱՄՆ-ից, Կանադայից, Ավստրալիայից, Լիբանանից, Իսպանիայից, Վրաստանից, Չինաստանից:

«Մրցույթի անցկացումն ինքնանպատակ չէ: Մենք ցանկանում ենք, որ Ա. Խաչատրյանի գործերը շատ հնչեն երիտասարդների կողմից»,- նշեց Սմբատյանը:

Դաշնակահարների մրցույթն անցկացվելու է 3 փուլով:

1-ին մրցանակին արժանացած մասնակիցը կստանա 15.000 ԱՄՆ դոլարին համարժեք դրամ, ինչպես նաեւ կկազմակերպվի նրա համերգը` Մարինյան թատրոնի սիմֆոնիկ նվագախմբի կամ Մոսկվայի պետական ակադեմիական սիմֆոնիկ նվագախմբի հետ 2011-12 թթ. համերգաշրջանում: 2-րդ մրցանակակիրը կարժանանա 10.000, իսկ 3-րդ մրցանակակիրը` 5000 ԱՄՆ դոլարին համարժեք դրամի:

Կոմպոզիտորների մրցույթն անցկացվելու է մեկ փուլով: Արամ Խաչատրյանի անվան միջազգային մրցույթի կազմկոմիտեն «Կոմպոզիցիա» անվանակարգի համար սահմանել է մեկ մրցանակ` 5000 ԱՄՆ դոլարին համարժեք դրամ: