Դու ո՞վ ես, որ ես քեզ ծեծեմ. Մհեր Սեդրակյանը՝ Վահան Մարտիրոսյանին

Այսօր ՀՀԿ խմբակցության պատգամավոր Մհեր Սեդրակյանը լրագրողների հետ զրույցում անհեթեթություն համարեց այն խոսակցությունը, թե իր որդին և ընկերները ծեծել են «Ներազգային ազատագրական շարժում» նախաձեռնության ղեկավար Վահան Մարտիրոսյանին և նրա կնոջը:

«Ես նման անձ չեմ ճանաչում: Նա երկու, երեք տարի ապրել է մեր թաղամասում, բայց ես չեմ ճանաչում: Եթե երեխու մորը խփում են գետնին, և երեխեն ծեծում է այդ մարդկանց, ամոթ էլ կլինի, որ չծեծեր: Տասնվեց տարեկան երեխա է: Հիմա գործն ընթացքի մեջ է, ինքը փախած ա, երբ որ կբռնեն, կբերեն, այդ ժամանակ կպարզվի, դուք էլ կիմանաք»,- ասաց նա:

Դիտարկմանը, թե Մարտիրոսյանը պնդել է, որ իբր Մհեր Սեդրակյանն իրեն հրավիրել է սրճարան՝ խոսելու, պատգամավորը նախ պատասխանեց, որ ինքը սրճարան չունի, այնուհետև նշեց, թե Վահան Մարտիրոսյանը իրենից ոչինչ չի ներկայացնում, որ նրան սրճարան հրավիրեր:

«Նախ` ինքը ո՞վ ա, որ ես էլ հրավիրեմ: Ինքը իմ համար ո՞վ ա: Ես չեմ էլ ճանաչել տենց մարդ: Դուք լսել ե՞ք, որ ինքը ում տանը մնացել է, երեք հազար դոլար է գողացել, և մարդ ու կնիկ փախած են: Հիմա որ կբռնեն, այդ ժամանակ դուք էլ կհամոզվեք, որ այն, ինչ իմ մասին ամբախ-զամբախ բաներ էր գրում, ես էդ մարդը չեմ: Կամ` դու ով ես, որ ես քեզ ծեծեմ, ինչի համար ծեծեմ»,- վրդովված ասաց Սեդրակյանը: