Գազի բալոնը լիցքավորելու ժամանակ պայթել է

Երեկ հայտնել էինք, որ Երևան-Արարատ մայրուղում` Դիմիտրով գյուղի մոտ տեղակայված գազալցակայաններից մեկում լիցքավորման ապարատը միացնելուց  վայրկյաններ անց պայթել է «Օպել» մակնիշի ավտոմեքենայի գազաբալոնը: ՀՀ Ոստիկանությունն այսօր մանրամասներ է ներկայայցրել կատարվածից. «Օգոստոսի 24-ին ոստիկանության Արտաշատի բաժնում տեղեկություն է ստացվել, որ Երևան-Երասխ ճանապարհին՝ Դիմիտրով գյուղի հատվածում գտնվող գազալցակայնում, ավտոմեքենայի գազի բալոնը լիցքավորելու ժամանակ այն պայթել է: 

Նյութերի նախապատրաստման ընթացքում պարզվել է, որ նույն օրը, ժամը 09.40-ի սահմաններում, Դիմիտրով գյուղում գտնվող գազալցակայանում 1986 թ. ծնված Հարություն Հ.-ին պատկանող «Օպել Վեկտրա» մակնիշի ավտոմեքենան լիցքավորելու ընթացքում գազի բալոնը պայթել է:

Պատճառված վնասի չափը կազմում է 700.000 դրամ:
Պայթունի հետևանքով մարդիկ չեն տուժել:
Հանգամանքները պարզվում են:
Կատարվում է հետաքննություն»: