Սեպտեմբերի 14-ի աշխատանքային օրը տեղափոխվում է սեպտեմբերի 19

Այսօր կառավարության նիստում կառավարության աշխատակազմի ղեկավար-նախարար Դավիթ Հարությունյանը ներկայացրեց մի որոշում, որը կապված էր «Տոների և հիշատակի օրերի  մասին»,  «Խղճի ազատության մասին», «Կրոնական կազմակերպությունների մասին» օրենքի 17-րդ հոդվածի հետ: Նախարարի խոսքով` աշխատանքային օրը տեղափոխելու մասին`  կառավարության որոշման  նախագծի ընդունումը նպատակ ունի  հնարավորություն ընձեռել  ՀՀ քաղաքացիներին  Խաչվերացին`  սեպտեմբերի 13-ին հաջորդող  հիշատակի օրն այցելելու իրենց ննջեցյալների գերեզմաններին:

«Առաջարկում ենք սեպտեմբերի 14-ի աշխատանքային օրը տեղափոխել  սեպտեմբերի 19` շաբաթ օրը»,- ասաց Դավիթ Հարությունյանը:

Վարչապետը հավելեց, որ  Խաչվերացի տոնի կամ Սուրբ Խաչի հաջորդ օրը նշվում է որպես ննջեցյալների հիշատակի օր: Դա է պատճառը, որ սեպտեմբերի 14-ին հաջորդող երկուշաբթի օրը հայտարարվում է ոչ աշխատանքային: «Միաժամանակ, խաղողօրհնեքին հաջորդող երկուշաբթին կլինի աշխատանքային, սակայն կոչ եմ անում բոլորին` այդ երկուշաբթի օրը` օգոստոսի 17-ին, ընդառաջել այն քաղաքացիներին, ովքեր այցելելու են եկեղեցի ու գերեզմանոց` մասնակցելու հոգեհանգստյան արարողություններին»,- նշեց Հովիկ Աբրահամյանը: