Քաղաքացիները պահանջում են հանել բոլոր արագաչափերն ու տեսախցիկները

Այսօր «Դուրս մեր գրպանից» քաղաքացիական նախաձեռնության անդամները լրագրողների հետ խոսեցին արագաչափերի, տեսախցիկների և տուգանքների մասին: Քննարկվեց, թե որքանո՞վ է ճանապարհային ոստիկանության նպատակը` տուգանքների ու տեսախցիկների միջոցով նվազեցնել պատահարների ու խախտումների թիվը, արդարացնում իրեն:

Նախաձեռնության անդամ Վարդան Հակոբյանը նշեց, որ շարունակելու են պայքարել արագաչափերի դեմ, որովհետև չեն ցանկանում երթևեկության գերին ու պատանդը դառնալ: Նրա խոսքով` արագաչափերն ու տեսախցիկները պետք է ծառայեն անվտանգ երթևեկության պահպանմանը,  այլ ոչ` ժողովրդի կեղեքմանը:

Նախաձեռնության անդամները պահանջում են ճանապարհային ոստիկանությունից` ի վերջո, ասել, թե որքանո՞վ է արդարացված արագաչափերի ներդրումը, ինչո՞վ է արդարացված այդքան գումարների շորթումը վարորդներից, և որքանո՞վ պակասեցին վթարները:

«Վիճակագրությունը ցույց է տալիս, որ արագաչափերի տեղադրումը բացարձակապես ոչինչ չի տվել, բացի այն բանից, որ դատարկվել են մեր գրպանները: Որտե՞ղ են գնում միլիարդավոր գումարների տուգանքները: Իբր խախտումի համար ենք վճարում, բայց այդ խախտումից ոչ ոք մեզ չի ապահովագրում, նշաններ չեն տեղադրվում, անվտանգ երթևեկության համար անհրաժեշտ ատրիբուտները չեն տեղադրվում: Փաստորեն, ճանապարհային ոստիկանության պնդումները փուչ են դուրս եկել, ուստի պետք է ոչ միայն չավելացնեն տեսախցիկներն ու նկարահանող սարքերը, այլև դրանք բոլորը պետք է հանվեն»,- ասաց Վարդան Հակոբյանը` հավելելով, որ ինքը, լինելով ԱՄՆ-ում, Եվրոպայում, տեսել է, որ այդ արագաչափերը և նկարահանող սարքերը հանվել են:

Եթե ճանապարհային ոստիկանությունը չի հանում դրանք, ապա մարդկանց թող տան  մինիմալ սխալվելու իրավունք` կիրառելով բալային սանդղակ: