Ստեփան Սարգսյանի մրցաշարին կմասնակցեն մի շարք անվանի ըմբիշներ

Ազատ ոճի ըմբշամարտի Հայաստանի հավաքականն ուսումանամարզական հավաք է անցկացնում Ծաղկաձորում: Հավաքականի մարզիչ Արայիկ Բաղդադյանը լրագրողների հետ զրույցում խոսեց հուլիսի 17-19-ը Երևանի «Միկա» մարզադահլիճում տեղի ունենալիք` Ստեփան Սարգսյանի անվան մրցաշարի մասին:

«Վաղը  կավարտենք  ծաղկաձորյան հավաքը: Հուլիսի 17-19-ը Երևանի «Միկա» մարզադահլիճում անցկացվելու է օլիմպիական խաղերի արծաթե մեդալակիր, աշխարհի եռակի գավաթակիր, Եվրոպայի չեմպիոն Ստեփան Սարգսյանի 20-րդ մրցաշարը: Այս տարի մասնակիցների ուժեղ կազմ է հավաքվել: Ստեփան Սարգսյանի 20-րդ մրցաշարը միջազգային մրցաշարերում  մասնակիցների կազմով կարող է զիջել միայն Բելառուսում անցկացված Մեդվեդի մրցաշարին: 14-15 երկրներից օլիմպական չեմպիոններ, Եվրոպայի և  Ասիայի չեմպիոններ, ինչպես նաև  այլ տիտղոսակիր ըմբիշներ են մասնակցելու: Մեր տղաները բոլորն էլ մասնակցելու են այս մրցաշարին: Սա կլինի նաև ընտրության հնարավորություն մեզ համար աշխարհի առաջնությունից առաջ: Ով լավ հանդես կգա, 99 տոկոսով նրանք են մեկնելու աշխարհի առաջնությանը»,- ասաց Բաղդադյանը: