Ծննդատանն ամուսնու կրակոցներից տուժած կինը Դվին գյուղից է. երեխան ծնվել է անհաս

Այսօր առավոտյան ծննդատանը ամուսնու կողմից արձակված կրակոցներից վիրավորված կնոջ` Մելինե Ասատրյանի վիճակը ծայրահեղ ծանր է: Հիվանդանոցից Yerkir.am-ի թղթակիցը հայտնում է, որ այս մասին լրագրողների հետ ճեպազրույցում ասել է «Արմենիա» ԲԿ-ի բուժօգնության գծով տնօրեն Արսեն Գրիգորյանը:

Նրա խոսքով` տուժածը Արարատի մարզի Դվին գյուղից է: Կինը երեք օր առաջ էր ծննդաբերել` կեսարյան հատումով, իսկ երեխան ծնվել է անհաս: Ըստ Գրիգորյանի` կինը բազմաթիվ վնասվածքներ է ստացել: Նրա մոտ հայտնաբերվել են բազմաթիվ բեկորային գնդակային վիրավորումներ: «Նախնական տվյալներով` երեք գնդակային վիրավորման հետ գործ ունենք: Կան վնասվածքներ ծոծրակային, պարանոցային և ուսագոտու շրջանում: Մի գնդակը դուրս է եկել մարմնից: Այժմ բժիշկները կատարում են վերքերի առաջնային մշակումներ»,- հայտնեց նա:

Հավելենք, որ դեպքի պահին երեխան հիվանդասենյակում չի եղել: