Այստեղ եմ, որ պաշտպանեմ ցուցարարներին. Մելինե Դալուզյան

Հայտնի ծանրորդ Մելինե Դալուզյանը երեկ Բաղրամյան պողոտայում էր` ակտիվիստների կողքին: Yerkir.am-ի հետ զրույցում նա նշեց, որ առաջին օրվանից ցուցարարների կողքին է եղել, քանի որ, հաշվի առնելով ժողովրդի սոցիալական վիճակը, հիմա ուղղակի անհնար է էլեկտրաէներգիայի սակագինը բարձրացնել:

«Հիմա էլ այստեղ եմ, քանի որ լարված դրություն է, այստեղ եմ, որպեսզի պաշտպանեմ ցուցարարներին»,- ասաց Դալուզյանը:

Ըստ նրա` նախագահի հայտարարությունը, որոշակի առումով, ժողովրդի պահանջների կատարում չէ, դրա համար էլ մարդիկ շարունակում են մնալ Բաղրամյան պողոտայում: «Երբ լիարժեքորեն չեղարկվի, արդեն այստեղ մնալը ճիշտ չի լինի, իսկ քանի որ կասեցվել է, ժողովուրդը կմնա մինչև վերջ: Ես նույնպես պատրաստ եմ մնալ` ժողովրդին պաշտպանելու համար: Չեմ կարծում` ևս մեկ անգամ բռնի ուժ կիրառելը տեղին կլինի, դրա փոխարեն կառավարությունը պետք է ուրիշ կերպ հարցին լուծում տա, որ ժողովուրդը հասկանա` իր գրպանից չի վճարվելու»,- ասաց Մելինե Դալուզյանը: